A historia de Xialma · Ribeira Sacra do Miño
Hai lugares que non se visitan. Quedan dentro.
Xialma nace da necesidade de gardar unha paisaxe, unha memoria e unha maneira de mirar o mundo.
Xialma naceu moito antes de existir unha botella.
Naceu ao volver á terra, ao deter o paso e comprender que aquela paisaxe sobre o Miño non era só un escenario. Era memoria, familia, oficio e unha forma de estar no mundo. O viño chegou despois, como unha maneira de preservar todo iso e compartilo.
01 · A mirada
Unha mirada profesional detrás de Xialma.
Detrás de Xialma estou eu, Xaime Cortizo, fotógrafo e comunicador visual cunha traxectoria profesional de máis de quince anos, consolidada e recoñecida en distintos ámbitos da fotografía e da comunicación visual. Ao longo deste percorrido traballei en cultura, turismo, gastronomía, empresa, retrato, territorio e viño, construíndo unha mirada propia baseada na luz, na emoción e no respecto polos lugares e as persoas.
A fotografía ensinoume a observar, agardar e recoñecer o esencial. Na viña atopei esa mesma forma de mirar: escoitar a paisaxe, comprender os seus ritmos e saber cando intervir e cando deixar que fale a natureza.
Xialma nace do encontro entre esas dúas experiencias. É o meu proxecto máis persoal: unha maneira de transformar paisaxe, memoria e tempo en viño.
Cada botella é, dalgún xeito, outra forma de fotografar a Ribeira Sacra: non cunha cámara, senón con terra, tempo e viño.
Fotógrafo · Comunicación visual
+15 anos de traxectoria profesionalCultura · Turismo · Gastronomía · Empresa · Retrato · Territorio · Viño
Coñecer o meu traballo profesionalLa Voz de Galicia
«La fotografía captura la luz del instante, el vino la del año entero»
Xaime Cortizo · fotógrafo e viticultor · La Voz de Galicia · 22 de febreiro de 2026
Ler a entrevista en La Voz de Galicia02 · O nome
Un nome onde cabe unha familia.
Xialma é un nome que nace preto, case en voz baixa. Hai nel unha presenza persoal, unha memoria compartida e os ecos de quen forma parte desta historia. Pero, sobre todo, hai unha palabra que o sostén todo: **alma**. A alma da terra, da familia, da paisaxe e do tempo. Porque Xialma non quere ser só un nome nunha etiqueta. Quere gardar aquilo que non sempre se ve: as raíces, os afectos, os silencios, os lugares aos que sempre regresamos e todo o que permanece cando os anos pasan. Un nome para falar do que queda. Do que nos pertence. Do que levamos dentro.
Paisaxe en botella.
03 · O territorio
Dúas viñas. Un mesmo río.
Xialma constrúese arredor de pequenas viñas singulares no territorio da Ribeira Sacra do Miño: Son viñas a escala humana, onde é posible coñecer cada recuncho, cada cambio de luz e cada diferenza entre unha parcela e outra.
O Miño sepáraas dez kilómetros, unha en cada orilla, e úneas ao mesmo tempo. Entre bancais, pedra e vexetación aparecen variedades distintas que se complementan. Non buscamos uniformar a paisaxe. Buscamos interpretala.
04 · O viño
Facer viño sen borrar o lugar do que procede.
A filosofía de Xialma parte dunha idea sinxela: intervir o necesario e escoitar moito. A fermentación espontánea, o traballo pausado na adega e o paso por carballo francés buscan acompañar o viño sen esconder aquilo que chega da viña.
O resultado busca frescura, elegancia e profundidade. Un tinto que ás veces definimos como “un tinto con alma de branco”, porque a finura e a enerxía importan máis ca a potencia.
- Orixe
- Ribeira Sacra do Miño
- Elaboración
- Fermentación espontánea
- Crianza
- Carballo francés
- Escala
- Edición limitada
05 · A primeira colleita
1.560 botellas e un salto ao baleiro.
Cando as primeiras botellas estiveron rematadas e numeradas unha a unha, Xialma deixou de ser unha idea. Cada botella levaba meses de traballo, decisións, dúbidas, vendimas, fotografías e tardes mirando cara ao Miño. Levaba unha parte desta historia.
06 · Un primeiro recoñecemento
Medalla de Ouro · Guía Paadín 2026.
O premio á primeira colleita foi importante, pero aínda máis o que representaba: a confirmación de que unha historia profundamente persoal podía emocionar tamén a persoas que nunca estiveran nas nosas viñas. Que aquela paisaxe que intentaramos gardar nunha botella podía ser comprendida desde o outro lado dunha copa.
07 · O que vén
Esta historia acaba de comezar.
Cada vendima permite comprender un pouco mellor as viñas. Seguimos recuperando, plantando, observando e aprendendo. E seguimos imaxinando maneiras de compartir Xialma arredor dunha mesa, nunha cata ou camiñando entre as viñas mentres o Miño aparece e desaparece entre a vexetación.
Porque Xialma quere ser viño, pero tamén experiencia. Un punto de encontro entre viño, fotografía, arte, gastronomía, paisaxe e persoas.
Quizais hoxe o verdadeiro luxo sexa saber de onde veñen as cousas, coñecer quen está detrás e ter tempo para gozalas.